موضوع: عراقيون فوق القمر الثلاثاء فبراير 02, 2010 11:55 am
عراقيـــــــــــــــــون فـــــــــــوق القمــــــــــر ـ1 (الفصل الأول )
المركبة الفضائية هتشكوك 7 تطير من الأرض في طريقها للقمر وكابتن المركبة يقول : سيداتي آنساتي سادتي تقلع الآن المركبة هتشكوك 7 من الأرض في طريقها للقمر أرجو ربط الأحزمة واسناد الكراسي الى أماكنها الطبيعية .. في حالة الطواريء أرجو استخدام الأكسجين بالضغط على الزر الأحمر أما في حالة الهبوط الاضطراري فأرجو الابقاء في أماكنكم وتغميض عيونكم .. لأنه خاف تنزلق المركبة ويتغير اتجاهها شوية علمود ما تخافون .. أما في حالة ان المركبة خلاص راح توكع فبامكانكم استخدام البرشوتات والقفز من المركبة .. وعلى فكرة ترى البرشوتات على العدد خاف بيكم عراقيين جايين قجق بجوازات مزورة ترى ما الهم حق لا باستخدام البرشوتات ولا التنفس من الاكسجين مالت المركبة .. مع تمنياتنا لكم بالسفر الممتع في مركبتنا هتشكوك 7
صبرية : عزا .. هاي اشلون عرفوا انه فيه عراقيين في المركبة ؟
جاسم الأعور : ايه بس احنا جوازاتنا شغل مضبوط صحيح مزورة بس الله وكيلكم هذا اللي سواها كلش شاطر شال صورة صاحب الجواز بأشعة الميرزا وخلى صورتي ..
أبولقاء : أخوية أشعة ميرزا شنو انتو ليش متخلفين ؟ .. أشعة الليزر .. احنا في سنة 3000 ميلادي وبعدكم ما تعرفون اسم أشعة الليزر وهاي هي مزبلة بشارع السعدون بقواطي شغل سوريا يعني شغل ستوكات ..
أبو لقاء يحجي وية نفسه : عاوووووه هاي لهسة مجلبتلي بايران ؟
تحسين : يا جماعة انتو متأكدين ان اللي سوالنا الجوازات شغله مضبوط ؟ مو يكولون انه هذاك اليوم صايدين عراقيين بجوازات مزورة على حدود المريخ وجايين يطلبون لجوء خومو يصير حالنا مثل حالهم !!!
جاسم الأعور : لا خوية اطمئن .. هاي الجوازات مو مثل الجوازات القديمة أم الصفحات الورقية اللي صارلها أكثر من خمسميت سنة ملغية هاي الجوازات الجديدة عليها شاشة كمبيوتر اتطلع لك الصورة الأصلية والبيانات واذا حاول أحد يغير بهاي البيانات ويلعب بيها تدخل كبل فيروسات على الصفحة وتشعل أبوه للجواز بس صاحبنا المزورجي من سكان عطارد وهذولة همة أهل التزوير والقجق !!!
المضيفة تدخل على المسافرين وهي تدز عربانة : حب .. جكاير .. علك ... حب .. جكاير .. علك ..
تحسين : رحمة لوالديج فد باكيت جكاير ماركة أبو قمرين ..
المضيفة : ماكو أبو قمرين .. فيه جكاير أشعة اكس ..
تحسين : لا هذا كلش قوي .. ماكو جكاير لف " درب التبانة " ؟
المضيفة : فيه بس مهرب شغل غريندايزر ..
تحسين : انطينا باكيت رحمة لذاك الأب الطيب .. بس تاخذون دولار أرضي لو مريخي ؟
المضيفة : أنا أفضل المريخي لأن الأرضي هواية يطلع منهم مضروبين وعلى فكرة الك خصم 10 % لأن أسعارنا مثل أسعار السوق الحرة .. تاكس فري..
تحسين : شنو يعني تاكسي فريح ؟ اشكد الحساب يصير بلة ؟
المضيفة : 300 دولار مريخي ..
تحسين : حييييييل ليش غالي .. عدنا بالأرض على 120 دولار.. وينطونا جداحة بالطاقة النووية هدية وياه !!!
رحيم يصحى من النوم ووجهه معقوج : أكول .. يا متى الغدا ؟ المهرب قال انه راح ينطوكم وجبة بالمركبة ..
أبو لقاء : ايه بس غداهم ترى حبوب فيتامينات مع كلاص ماي خومو يجيبولك تمن ومرق بامية ..
أبو لقاء : هنا ؟ بالمركبة ؟؟؟ وجدر دولمة ؟؟؟ رحمة لوالديج لا تفضحينا كدام الأجانب ترى فيه مسافرين عندهم ترانزيت بالقمر وهمة بطريقهم لكوكب زحل ..
جاسم الأعور : يا معود خلينا ناكل لوتريدنا نموت جوع ؟ .. عيني صبرية صبي الغدا وراح ناكل على الأرضية خومو دافعين فلوس للقجقجي علمود نموت جوع ؟؟؟!!!
( نكمل السالفة في الحلقة القادمة )
جلجامش
عدد المساهمات : 115 تاريخ التسجيل : 19/12/2009
موضوع: رد: عراقيون فوق القمر الثلاثاء فبراير 02, 2010 12:33 pm
والله حلو هذا الفصل .. بس بالمقابل فضحتنا لأن كل العراقيين اللي بالسويد جايين قجق ويمكن بنفس المركبة
نشمي مشرف
عدد المساهمات : 228 تاريخ التسجيل : 23/05/2008
موضوع: رد: عراقيون فوق القمر الخميس فبراير 04, 2010 4:33 pm
عراقيــــون فـــوق القمــــر ـ 2
(الفصل الثاني)
المركبة هتشكوك7 لازالت في طريقها للقمر والمسافرين كلهم كاعدين بأماكنهم .. وجماعتنا العراقيين انتهوا من أكل الدولمة بس ظل شي واحد وهو فد استكانة جاي تعدل الراس بعد ما الدولمة سطرت روسهم .. المضيفة تمر على المسافرين نفر نفر وتشوف شنو يشربون ..
أبو لقاء : لو سمحتي فد استكانة جاي ..
جاسم الأعور : رحمة لوالديج من راس القوري ..
المضيفة : اشلون يعني من راس القوري ؟
صبرية : عيني يعني جاي زنكين..
المضيفة : جاي سنكين شنو ؟
تحسين : يعني نريده جاااااي مو شاااااي .. جاي عراقي ثقيل يعدل الطاسة لأنه مبين الرحلة مالتكم طويلة واحنا ناوين نشرب جاي ونلف روسنا وننام
المضيفة جابت الجاي وانطت لكل واحد كوب جاي ..
تحسين بصوت واطي : ألا يا مضروبة الجلوة هو هذا جاي لو بول تيس ؟
وحدة من الحريم الأجنبيات اللي مسافرات بنفس الرحلة : أوووووووف سوفاج شنو هاي ريحة الدولمة انتشرت بالمركبة ؟
مسافرة أجنبية رابعة تقول لزوجها : أنا بعد ما أسافر بهاي الخطوط اذا هذولة العراقيين يسافرون بيها..
رحيم صار كل شوية يتريع وتحسين لزمته أم العرافي والمضيفة ما اتحملت الوضعية واغمي عليها ..بعد عشرين ساعة ضوئية .. قائد المركبة يقول : أعزائي المسافرين أرجو ربط الأحزمة سوف نصل بعد قليل الى مطار شمال القمر .. خاف فيكم أكراد ترى هذا شمال القمر خومو تحسبوه كردستان ..
نزلت المركبة في المطار .. وأبو لقاء يقول لجماعته العراقيين .. ها .. جاهزين ؟ شكيتو جوازاتكم ؟ ترى اللي عنده جواز سفر ممكن يرجعوه وما يقبلوه كلاجيء.. فاهمين شنو تقولون ؟ خاف يسألوكم عدكم فلوس قولوا لا علمود يصرفولكم معاش .. واذا سألوكم عن القجقجي قولوا ما نعرفه وانطوا مواصفات فد واحد وهمي خومو تورطونا ؟.. افتهمتوا لو أعيد عليكم ؟
نزل جميع المسافرين من المركبة وبما فيهم العراقيين وهناك ضابط الجوازات قال : العراقيين اللي يريدون يقدمون لجوء يجون على اليسار وباقي المسافرين يروحون يخرجون من الجوازات ..
استغرب ضابط الجوازات لما شاف كل المسافرين اجوا على اليسار ومحد راح يخرج من الجوازات ..
موضوع: رد: عراقيون فوق القمر الإثنين فبراير 08, 2010 10:23 pm
عراقيون فوق القمر ـ 3
(الفصل الثالث والأخير)
دخل العراقيين للقمر على أساس انهم لاجئين وأهل القمر استقبلوهم أحسن استقبال واحتشدت الجماهير القمرية خارج المطار لاستقبال اخوانهم العراقيين من سكان الأرض .. ولما ظهروا العراقيين لأهل القمر صار أهل القمر يهتفون : هلا بيكم هلا وبجيتكم هلا .. وطبعا كانت هناك يافطات وشعارات رافعيها أهل القمر مكتوب عليها : اخوان أرض وقمر وهذا الوطن ما نبيعه ...... وحدة أرضية قمرية لا سنية ولا شيعية ..... لا للارهاب المريخي ..... يسقط الغزو المريخي .....بس فيه واحد محشش بطران من أهل القمر رافع يافطة كاتب عليها : الهزيمة .. الهزيمة .. الهزيمة لنادي المريخ السوداني ..
احتفل أهل القمر باخوانهم العراقيين وذبحولهم كم وحش فضائي تيمنا بهاي المناسبة .. وصار أهل القمر يطلقون طلقات صلي أشعة فوق البنفسجية من رشاشاتهم الأوتوماتيكية للتعبير عن الفرحة .. وجابوا سيارة فضائية خصوصية لنقل العراقيين من المطار الى دار اقامتهم وطبعا على طول الطريق كانت الهورنات ما توقف
صبرية : صلوات على محمد .. هاي كلها فرحانين على مودنا ؟
جاسم الأعور : ولكم صدددددددك جذذذذذذذذب هيجي احنا غاليين عليهم .. والله لو كنا نعرف الوضعية هيج جان من زمان بعت بيتي واجيت للقمر ..
رحيم : أنا سمعت ان أهل القمر دا يستفادون من جيتنا احنا للقمر ..
أبو لقاء : شنو بلة يستفادون همة من جيتنا ؟ طمعانين همة بدشداشتك الخايسة لو بنعالك المعاد ؟
رحيم : لا .. المسألة مو هيج .. المسألة ان هيئة الأمم الفضائية دا تدفعلهم على كل لاجئ مبلغ محترم ..
أبو لقاء : لا عيني هذا حجي فاضي ولا تصدقوه وماكو هيجي شي ..
تحسين : يا جماعة أنا لهسة مو مصدق نفسي اني بالقمر .. أنا سمعت هواية عن الميزات اللي يحصل عليها الانسان العراقي بالقمر يقولون ان السكن والمعيشة وآجار البيت والماي والكهربا على حسابهم حتى العلاج عليهم ومو ناقص بس يزوجونا من بناتهم .. يقولون ان بنات سكان القمر مثل كوكبهم .. قمر ..
صبرية : بس ماكو أحلى من العراقيات .. الرجال العراقي ما يلاكي أحسن منها لأنه قبل ما يقول آه هي تحس بيها .. بس ما أعرف ليش هذا مشعول الصفحة زوجي طلقني .. أكيد ماعنده ذوق ..
أبو لقاء : والله عنده ..
صبرية : تقول شي أبو لقاء ؟
أبو لقاء : ها .. لا .. أنا أقول خلينا نروح غرفنا وننام لأن باجر ورانا جولة بسوق القمر المركزي .. تصبحون على خير ..
( اليوم الثاني وفي احدى أسواق القمر )
أبو لقاء : ما شاء الله .. هذا خوش سوق كلش جبير .. هاي شنو مكتوب ولكم شوفوا .. مطعم الرافدين .. هذا أكيد مطعم عراقي ..
تحسين : شوفوا .. شوفوا .. شنومكتوب على هذا المحل .. يوجد لدينا سيديات أغاني عراقية ..
صبرية : معقولة ؟ هذا بياع لبلبي وأهل القمر واكفين طابور عليه ..
رحيم : وهاي كهوة عراقية .. تعالوا اليوم جاياتكم على حسابي ..الجماعة دخلوا الكهوة وصاحب الكهوة يرحب بالزباين : يا اهلا وسهلا والله حلت البركة بحبايبنا العراقيين وهاي أحسن طاولة لأغلى زباين ومن هنا ورايح اعتبروا ان هاي الكهوة كهوتكم ..
أبو لقاء : انت من سكان القمر لو عراقي ؟
صاحب الكهوة : أنا عراقي بس محور .. وهسة أنا قمري أنا صارلي ميتين سنة قمرية تارك العراق وجاي للقمر من أيام ما كان القمر يحكمه غريندايزر الثالث عشر ..
رحيم : غريندايزر أبو المخابرات ؟
صاحب الكهوة : لا .. هذا غريندايزر اللي تحجي عليه لزم الانضباطية العسكرية بعدين .. غريندايزر هذا من الائتلاف الفضائي اللي جابه الاحتلال المريخي وخلاه رئيس على القمر .. بس أولاد الملحة بالقمر حنوا لأصلهم العراقي وطكوه بالدهن ورموه بمزبلة التاريخ .. لازم تعرفون شي وهو ان الانسان العراقي مهما تغرب ومهما وصلت فيه المواصيل فلابد انه راح يحن لأرضه في دجلة والفرات واللي اجة للقمر لابد انه يشتاق لنخل العراق في يوم من الأيام .. ترى العراق غالي علينا يعيش جوانا ولا يمكن انا ننساه حتى لو ظلينا بالقمر أربع آلاف سنة .
موضوع: عراقيون فوق القمر 
الثلاثاء فبراير 02, 2010 11:55 am
