ابليس يقرر مغادرة العراق من غير رجعة

إبليس يقرر مغادرة العراق الى غير رجعة

..!

2011-12-18 :: صديق الرابطة العراقية ::

قرر ابليس ترك العراق..
لكن العراقيين استنكروا.. وخرجوا بمظاهرات في عموم العراق، وساحة التحرير خصوصاً، وقرروا أرسال وفد لكي يفاوض ابليس بالبقاء في أرض العراق المباركة..

لكن ابليس رفض ...!!


وقال لهم إبعدوا عني ياعراقيين إنتوا ما تستاهلون.. كل واحد منكم يجيني شحاذ وحافي ومو لاكي اكل ياكله، وجان قميص ماعنده وكاضيها بالتاتات مبهذل يومية والفلس حسره عليه.. أعلمه وأخليه يبوك حتى يعيش برفاهيه عاليه، ويغش حتى يتخرج بامتياز.. ويزور بالإنتخابات ويرشي حتى يكون عضو مجلس نواب أو رئيس ..

وأول مايكعد عالكرسي أشوفه معلق وراه: [ هذا من فضل ربي ].!

هاي ميخالف قبلت بيها، بس ينافسون عباد الله الصالحين وياخذون مكانهم بالحج وعلى نفقة الحكومة ويجون يرجموني بالحجار..!؟ صايرة دايرة؟ بشرفكم اكو واحد ابن اوادم يضرب صاحب فضل عليه بالحجار ؟ وهاي المرة 49 حجارة وبقوة ولمدة ثلاث ايام..!

يولوا جان استيحتوا، مو انتم لو تنضربون بالحجار طول عمركم ماتنمحي ذنوبكم، لان مو سرقة فردية، إنما سرقة متوزعة على اثنين وثلاثين مليون طفل وشيخ وامرأة وارملة... جان استحيتوا..!

وهكذا تسارع العراقيون لكتابة نص دستوري على ابليس أن يبقى بالعراق، واذا ما قبل ... يفصلوه عشائرياً

..!